سمعت قبل كدا عن مصطلح اسمه The monkey mind .. المصطلح دا العلماء اقتبسوه من تصرفات القرد .. ودا لان القرد دايماً بيتنقل من شجره لشجرة في وقت سريع جداً .. عشان يدور علي المتعه اللي موجوده في الاكل اللي بيستمتع بيه علي الشجر .. وغالباً الموز .. اغلبنا بقا وهو داخل ينام بيمسك التليفون يقول لنفسه اما اتسلي فيه شوية قبل ما انام .. ويفضل يتنقل من فيديو للتاني للتالت .. عشان يلاقي نفسه ضاع منه ساعه ولا اتنين ولا تلاته .. وطبعاً دا تصرف مشابه لتصرف مين علي الشجره ؟؟ .. ها .. ايوه تصرف القرد ومن هنا جه مصطلح The monkey mind .. بحثاً عن المتعه .. طيب ازاي دا حصل وايه اللي قعدك الوقت دا كله .. السر كله في مصطلح اسمه ادمان التشتت انك بقيت مدمن علي الحركه الكتير وانك تتنقل من فيديو للتاني بصورة سريعه جداً ممكن لا تتعدي الثواني .. وتفسير دا انك بتدور علي المتعه اللي فيها ميزتين .. الاولي طبعا حاجه تكون ممتعه وبتوصلك للدوبامين .. التانيه .. انها تكون سريعه ومتاخدش وقت ولا مجهود .. لدرجة ان تيتكوك عملت الاستقصاء لمستخدميها عن رايهم في الفيديوهات الطويله .. ونتيجته كانت ان 50% من المستخدمين قالو ان اي فيديو بيعدي دقيقه هو فيديو مرهق .. يعني اللي بيلاقي قدامه فيديو حتي لو 3 دقايق ومفيد بيعتبره ملل !!
وفي معلومه تانيه مهمه مهم جداً انك تعرفها .. هتفسر ليك برده انت ازاي مش بتعرف توقف او تسيطر علي عدد الفيديوهات القصيرة الليي بتتفرج عليها .. زمان واحنا بنتفرج كان لازم اول ما توصل لنهاية اي صفحة عليها اي محتوي في مواقع التواصل الاجتماعي لو كنت عايز تدخل علي الصفحة اللي بعدها لازم تدوس Next او رقم الصفحة اللي بعدها .. لغاية اما جه في 2006 مطور مواقع ورائد أعمال إسمه Aza Raskin واخترع حاجه إسمها التمرير اللانهائي .. واللي بقت موجوده في جميع وسائل التواصل الاجتماعي واللي بتساعد علي وجودك أكبر وقت ممكن علي الموقع دا ..
..
طيب دا حصل ليه ؟ .. وإيه تأثيره علينا ايه ؟ .. وهل فعلا ليه تأثير علينا في حياتنا المهنية ؟ .. وممكن يكون سبب في أننا مش عارفين نطور من نفسنا ؟ .. وهل فعلا ممكن نتغلب علي المشكله دي ؟ .. وهقولكم كمان علي تجربتي الخاصة في الموضوع دا
..
في مقال نشره موقع اسمه Verywell Health ان المقاطع اللي زي الريلز دي هي اشبه بالسكاكر بالنسبة للعقل ..ودا لان العقل في رغبه دائمة انه يحصل علي الدوبامين فبالتالي تلقائياً بيروح علي المصادر اللي بتديله الدوبامين وخاصة لو الحصول عليها سهل وسريع لانه بيعزز شعورك بالرضا .. ودا اللي بيفسر ليه دايماً انت مش بتقدر توقف الريلز .. ولو مش عارف الدوبامين دا .. هي ماده كيميائية بتفرزها اماكن معينه في المخ بهدف تنظيم المزاج والمشاعر والمكافأة ..
طيب ايه هي المشاكل اللي ممكن يتسبب فيها الزياده المفرطه في مشاهدة المحتوي القصير دا ؟
هقولك علي 10 اسباب كفيله تقفلك من النوعية دي من المحتوي بعد ما تعرف هي بتعمل فيك ايه وقد ايه هي بتاثر عليك ..
أولاً : تأثر قدرتك علي الانتباه والتركيز تأثير
.. في الشغل .. في الجامعه او المدرسه .. او حتي لو بتطور من نفسك وبتاخد دورات تدريبية .. حتي في تواصلك في اليوم العادي محتاج تكون مركز ومنتبه .. وابحاث كتير اتعملت عن الوقت الطبيعي للانسان للتركيز المتواصل بيتراوح بين 25 دقيقه الي 35 دقيقة متواصلة وفقاً لعوامل كتير .. نومك .. صحتك النفسيه او البدنية وغيره .. لكن في النهاية بسبب المحتوي دا انت بتوصل لمرحلة انك وقت التركيز بتاعك قل جداً عن المعدل الطبيعي
ثانياً : صعوبة الصبر علي التعلم
مفيش اي كورس ولا دورة تدريبيه هتقعد دقيقة ولا دقيقة ونص ومن كتر مشاهدتك للفيديوهات دي هتبقي ملكش خلق انك تحضر دورة تدريبية كام ساعه عشان تتعلم .. انت خلاص دماغك اتبرمجت علي انك تطلب المعلومه السريعه .. والسبب في دا ان المعلومه ( هشه – سريعه – تشعرك بالثراء المعرفي )
ثالثاً : تضييع لوقتك : فبدل ما تستثمر وقتك في انك تخطط ليومك او تحل مشكله عندك في الشغل او تقعد مع اسرتك .. لا .. انت بتقرر تدخل في عالم اللانهايه اللي دخلته بنفسك ولو انت فاكر حتي لو بتتفرج علي فيديوهات مفيده دينية او علمية او غيره وطبعاً دا شيء مستحيل السيطرة عليه لان خوارزميات المواقع دي مش بتدعم المحتوي دا علي قدر دعمها للمحتوي التاني اللي كلنا عارفينه .. فالعقل غير قادر علي إستيعاب كم المعلومات السريعه اللي بتتقالك دي .. فلو قعدت 3 ساعات تتفرج علي فيديوهات قصيره ولا هتطلع فاكر اي معلومة .. من كتر المعلومات اللي انت غرقت فيها واللي عقلك مش هيقدر يستوعبها خالص .. ولو عايز تجرب روح اتفرج علي 30 ولا 50 ريل ودا الحد الادني وشوف ايه الحصيلة اللي وصلتلها منهم كلهم هتلاقي حرفياً ولا حاجه .. 4 ساعات في اليوم .. 28 ساعه في الاسبوع .. 112 ساعه في الشهر .. 1344 ساعه في السنه .. فانت بتتكلم تقريباً في شهرين بالظبط بيضيعوا منك في السنه .. يعني انت وصلت ان في شهرين كاملين ضايعين من حياتك بسبب ادمانك اللا ارادي للمحتوي دا وللعلم دا غير اوقات تانيه كتير ضايعه علي العاب او شات مع صحابك او غيره
رابعاً : تأثر مهاراتك في القراءة اي حد فينا عشان يطور من نفسه .. ممكن يفتح موقع ياخد كورس .. او يقرا كتاب او مقال او يدور علي اي معلومه تفيده أساسي هنا انك تكون بتقرا .. بسبب ادمانك للمقاطع القصيرة دي وهي طبعاً اغلب المحتوي الحالي .. انت تلقائياً بتتحول لانسان كاره للقراءه لان في طريقة اسهل بكتير بالنسبالك انك تاخد بيها المعلومات .. ودا ليه بقا ؟ .. لان الدماغ بتعالج المحتوي المرئي اسرع .. وطبيعة الانسان انه بيدور علي الاريح والاسهل .
خامساً : الادمان الرقمي بسبب تأثير التكنولجيا عموما وخاصة نوع المحتوي المشابه للفيديوهات القصيرة يتحول الموضوع الي إدمان وغير قادر تماما علي انك توقفه حتي لو في اجتماع في خروجه في شغل في تجمع عائلي او حتي في كورس دافع فيه فلوس كتير ودا بيبقي ليه سبب تاني بجانب لسبب تاني ايضاً هو البحث عن ما فاتك اللي هو في الحقيقه ( اللاشيء)
سادساً : تغيير في خريطة العادات
يعني بدل ما تبقي عاداتك انك تقعد تفكر ولا تخطط ولا تتكلم مع حد في موضوع مهم ولا تقرا كتاب لا .. بتبقي عاداتك هي السكرول داون ولو فكرت انك تعمل دراسة بسيطه عن الوقت اللي بيضيع منك في اليوم وانت بتعمل كدا وخليناه متوسط 4 ساعات يوميا وللعلم في ناس اكتر من كدا بكتير هتلاقيهم
السبب اللي جاي خضني اول ما قريته
سابعاً : ضمور في المخ
في 2013 في مجلة اسمها المجلة الاوربية للاشعه طلعت تقرير ان الادمان الرقمي ممكن يؤدي الي ضمور هيكلي في القشرة الامامية للدماغ
ثامناً : العزله وفقدان الشغف :
وقت المشاكل دايماً بندور عن الراحه .. فانت هتوصل لمرحلة معينه وهي ان مع اي مشاكل هتحصلك هتروح تدور علي الدوبامين ومش هتلاقي اسرع من العزله في قوضتك وتاخد شوية دوبامين سريع من الريلز بعدد لا نهائي وفي دراسة عملتها مجلة فوربس قالت ان اغلب الموظفين بتميل للعزله بيكون بسبب ادمان المحتوي القصير دا ..
تاسعاً : صحتك الجسدية
من رقبتك لضهرك لعينك حتي لبشرتك كل دول بيتأثروا .. طبعاً طريقة قعدتك بتأثرعلي ضهرك ورقبتك .. غير ضعف نظرك .. غير الارق اللي بيسببه ليك بسبب اللون الازرق اللي خارج من شاشة الموبايل دا بيأثر علي خلايا مستقبلات الضوء في العين و بيأثر علي البشرة كمان وممكن يسب الشيخوخه الرقميه ..
عاشراً : التأثير السلبي علي مهارة التواصل الاجتماعي مع المحيط اللي حواليك
ممكن تبقي قاعد قدام حد بيشرحلك حاجه وتلاقي نفسك خلاص مش قادر تستحمل لانك عايزه يختصر كلامه .. هو علي فكرة ممكن ميكنش طول في الكلام .. بسبب خلاص انت مبقتش مستحمل .. فمن اهم المهارات علي الاطلاق هي مهارات التواصل ودا بسبب سيطرة المحتوي دا علي عقلك .. ف لا استيعاب ولا تركيز ولا انتباه ودايماً عايز كلام الشخص في التواصل يكون مختصر فبيظهر حتي عليك غصب عنك زهقك من الكلام
طيب ايه الحل لمشكلة زي دي ؟
ومش هديلك اي حلول صعبه ولا متعرفش تعملها ..
هتمرن عقلك الباطن علي حاجات معينه اهمهم انك تتفرج علي محتوي كتير زي اللي بتتفرج عليه دلوقتي .. وهو انك تغذي عقلك بمحتوي عن اضرار النوع دا من الفيديوهات ودا انا جربته وفرق معايا كتير .. وخليني اقولكم حاجه مهمه اني تحضيري للفيديو دا لوحده خلاني اوقف مشاهدة المحتوي دا بنسبة تعدت 90% من الوقت اللي كنت بقضيه علي النوعيه دي من الفيديوهات
1- هتدخل عادات مختلفه مكان عادة انك تمسك التليفون وتتفرج علي ريلز .. زي انك مثلا قبل ما تدخل تنام تقرا حاجه معينه او تسمع حاجه .. او حتي تجيب ورقه تكتب فيها هتعمل ايه بكرا .. او تكتب ايه الحاجات الحلوه اللي حصلتلك اليوم دا .. او تقرا اذكار
2- ابعد عنك تليفونك قبل ما تنام عشان لو جنبك هتستخدمه فخليه بعيد وخلاص
3- ممكن لمدة اسبوع او اتنين تستخدم تليفون عادي مش سمارت عشان تقدر من خلاله تعود نفسك .. طبعاً دا حسب شغلك وحتي لو مضطر خلي شغلك علي اللاب ..
4- في تطبيقات علي التليفونات الايفون او غيره .. بيخليك تتراك انت قعدت قد ايه وبيخلك كمان يعملك تنبيه انت استخدمت الابليكيشن لوقت قد ايه ودا بيساعدك جداً انك توقف موضوع التمرير اللا نهائي
5- لو الموضوع وصل لضرر كبير في حياتك وصعوبه في الابتعاد عنه تقدر تستشير متخصص نفسي
باختصار متفكرش ان المحتوي دا اثره عادي عليك لا دا بيدمر حاجات كتير وانت مش واخد بالك ..
في حالة انك تري ان المقال مفيد يمكنك مشاركته مع من حولك لتعم الفائده
Mohamed Ashour Elyamany
Certified Career Coach and HR Consultant
..
تستطيع الان طلب جلسات الارشاد والتوجيه المهني من خلال الرابط :
